Hiob 26 vo 42

Hiob 26 vo 42

26:1 Hiob erwideret:

2 "Wie sehr hast du dem Kraftlose geholfen!

Wie du de schwache Arm doch grettet hesch!

 3 Wie brillant hesch doch de berate wos a Wiisheit fehlt!

Wie grosszügig hesch din gsunde Menscheverstand enthüllt!

 4 Wem verzellsch da eigentlich öppis?

Wer het dich dezue inspiriert so öppis z sege

 5 Die im Tod Chraftlose zittere.

Sie sind tüüf une, tüüfer als s'Wasser und sini Bewohner.

 6 Nackt liit s Grab vor Gott

und de Ort vo de Vernichtig isch unbedeckt.

 7 Er spannt de Nordhimmel über em leere Ruum us,

hängt d Erde a nüüt uf.

 8 Er wicklet s'Wasser so i sini Wulche ii,

dass sie nöd under ihrem Gwicht verreissed.

 9 Er versperrt de Ablick vo sim Thron,

indem er sini Wolke devor usbreitet.

10 Er markiert de Horizont uf de Oberflächi vom Wasser.

Er zieht e Gränze zwüsche Liecht und Dunkelheit.

11 Sälbscht d Süüle vom Himmel schwanke –

sis Machtwort versetzt sie in Schrecke.

12 Dur sini Chraft wühlt er s Meer uf

und dur sin Verstand zerschmetteret er s Seeungehüür.

13 Mit sim Atem klart er de Himmel uf.

Sini Hand durebohrt die schwer zu fassendi Schlange.

14 Das alles sind nur d Säum vo sinere Wäge!

Nur es liisligs Flüstere isch vo ihm zverneh!

Drum: Wer chan sin machtvolle Donner verstah?"